ماہنامہ عبقری - جولائی 2010ء

اس ماہ کانورانی مراقبہ Meditation یعنی مراقبہ جہاں ازل سے روحانیت کی ترقی اور مشکلات کے حل کا علاج رہا ہے وہاں جدید سائنس نے اسے امراض کا یقینی علاج بھی قرار دیا ہے۔ ہزاروں تجربات کے بعد عبقری کے قارئین کے لئے مراقبے سے علاج پیش خدمت ہے۔ سوتے وقت اگر با وضو اور پاک سوئیں تو سب سے بہتر ورنہ کسی بھی حالت میں صرف 10 منٹ بستر پر بیٹھ کر بلا تعداد یَانُورُ یَابَاعِثُکا ورد اول و آخر 3 بار درود شریف پڑھیں پھر لیٹ جائیں۔ جس مرض کا خاتمہ یا الجھن کا حل چاہتے ہوں اس کو ذہن میں رکھ کر یہ تصور کریں کہ ” آسمان سے سنہرے رنگ کی روشنی میرے سر سے سارے جسم میں داخل ہو کر اس مرض کو ختم یا الجھن کو حل کر رہی ہے اور اس وظیفے کی برکت سے میں سو فیصداس پریشانی سے نکل گیا/گئی ہوں“ یہاں تک کہ اس تصور کو دہراتے دہراتے نیند آ جائے۔ شروع میں تصور بناتے ہوئے آپ کو مشکل ہو گی لیکن بعد میں آپ پر جب اس کے کمالات کھلیں گے تو حیرت کا انوکھا جہان اور مشکلات کا سو فیصد حل خود آپ کو حیرت زدہ کر دے گا۔ مراقبے کے بعد اپنی کیفیات فوائد اور انوکھے تجربات ہمیں لکھنا نہ بھولیں۔ نورانی مراقبہ سے فیض پانے والے ایڈیٹر صاحب السلام علیکم! اللہ سے خلوص دل سے دعا ہے کہ اللہ ”عبقری“ اور اس کے معاونین خصوصاً ایڈیٹر صاحب کی زندگی میں اپنی شایان شان برکتیں نصیب فرمائے۔ مارچ میں مراقبے کی طاقت و افادیت کے عنوان سے مزین شاندار مضمون پڑھا۔ بڑوں سے مراقبے کے لاجواب فوائد سنے تھے لیکن اسکے فوائد کا عین الیقین خود عملی مشق کرنے کے بعد ہوا۔ بس میں اتنا ہی کہوں گا اس نورانی عمل سے صرف تقدس اور پاکیزگی کے موتی ہی نہیں بلکہ اس کے ساتھ صحت و تندرستی، سکون و مسرت، کامیابی اور خوشحالی کی شمعیں روز روشن کی طرح تاباں ہوجاتی ہیں۔ اس نورانی عمل کو اپنایاتو میری زندگی میں ایسی لاجواب تبدیلی آئی کہ میرے مسائل خزانہ غیب سے حل ہونے لگے زندگی خوشیوں اور مسرتوں کی بہاروں کے ساتھ کچھ اس طرح مہربان ہوئی لفظوں میں اس کو بیان کرنا مشکل ہے۔ میں ”عبقری“ کے ذریعے سے ہر پریشان حال مرد و عورت کو یہ پیغام دینا چاہتا ہوں کہ وہ اس نورانی عمل کو اپنی زندگی کا مشغلہ بنائیں ۔ (رشید احمد۔ کہروڑپکا) پچھلا صفحہ